Гэр хорооллын айл өрхийн инженерийн хангамжийн асуудлаар шинэлэг технологийн судалгаа хийж байна.

 

Нийслэлийн Орон сууцны дэд бүтцийн газар нь Нийслэлийн Засаг даргын хэрэгжүүлэгч агентлагын хувьд нийслэл хотынхоо агаар, хөрсний бохирдлыг бууруулах, гэр хорооллын айл өрхийг эрүүл аюулгүй орчинд тав тухтай амьдрах орчин нөхцөлийг хангахад үйл ажиллагаагаа чиглүүлэн ажилладаг билээ.

2020 оны 04 сарын 13-ны өдөр Нийслэлийн Орон сууцны дэд бүтцийн газрын дарга Г.Ганзориг болон Нийслэлийн өмчит Улаанбаатар хөрөнгө оруулалт, менежмент ҮЦК ХХК-ийн гүйцэтгэх захирал Д.Отгонсүрэн нар гэр хорооллын дахин төлөвлөлтийн ажлын хүрээнд шинэлэг технологийг бий болгож, үйлдвэрлэлд нэвтрүүлэхээр ажиллаж байгаа Мегавүүд ХХК-ийн үйл ажиллагаатай танилцлаа.

Тус компани нь 2005 онд байгуулагдан, оффис болон орон сууцны интерьер тохижилтын ажил, барилгын дотор хаалганы  үйлдвэрлэл зэрэг чиглэлээр тогтвортой үйл ажиллагаа эрхэлж ирсэн үндэсний үйлдвэрлэгч компани бөгөөд сүүлийн жилүүдэд “АББАТ” хэмээх бүх төрлийн шатамхай хог хаягдлыг дахин боловсруулах термохимийн аргаар задлах шинэ технологийг зохион бүтээж, тоног төхөөрөмж угсралтын ажилдаа ороод, эхний ээлжийн захиалгаа хэрэгжүүлэхээр ажиллаж байгаа юм байна.

Мегавүүд ХХК-ийн захирал Ц.Ариунбат үйлдвэрийнхээ үйл ажиллагааг танилцуулахдаа “Манай компанийн бүтээн бий болгосон АББАТ төхөөрөмж нь хоногт 16 тонн нүүрс болон бусад шатамхай хог хаягдал үүнд бүх төрлийн уут сав, хуванцар, резин, яс, хоол хүнсний үлдэгдэл, өтгөн ялгадас, нефтийн үлдэгдэл шаар зэрэг дахин боловсруулагдаагүй хаягдлыг боловсруулах хүчин чадалтай, 550 кват/цаг эрчим хүч, 2-3гкал/цаг дулаан гаргах хүчин чадалтай төхөөрөмж бөгөөд хоногт 2-2,5 тонн хог хаягдал, 400-600 кг бохирын лагыг боловсруулж, шатдаг хий, нефть, кокс үйлдвэрлэнэ. Үүний зэрэгцээ шатдаг хийгээр ажилладаг ус халаах зуух, халаалт болон цэвэр ус түгээх, хог бохир цуглуулах дэд станцыг барьж байгуулан, гэр хорооллын айл өрхийг холбох боломжтой болох юм. Нэг АББАТ төхөөрөмжөөр Улаанбаатар хотын 200000 айлын дулааныг бүрэн хангаж, ахуйн хогны асуудлыг бүрэн шийдэж, хөрсний бохирдол, агаарын бохирдлыг бууруулахад бодит үр дүнг үзүүлнэ” гэж ярилаа.

Нийслэлийн Засаг дарга Нийслэлийн Орон сууцны дэд бүтцийн газрын хамт олонд тус компанийн үйл ажиллагаатай танилцаж, шинэ технологийн төхөөрөмжийн үр ашгийг судалж, гэр хороололд хэрэгжүүлэх боломжийг судалж үзэх талаар чиглэл өглөө.